調酒長知識

【香港調酒】我想喺香港學調酒有乜途徑呢?


各位朋友大家好,喺網上成日見到有人話點樣去學調酒好,如果你對調酒係一張白紙,從來未學過,想知道學調酒嘅途徑,就可以睇睇依篇文章分享吧,相信短短一篇文章可以令你了解到我們從教學經驗中得到嘅一些結論重點,尼喇喎!


香港學調酒嘅途徑主要有以下五種,為大家講解下依啲途徑嘅好與壞吧。


1. 睇Youtube學

網上YouTube搵下d片睇睇,從參考嘅角度係必須要咁樣做,因為咁樣先可以免費知道世界各地嘅調酒文化進度如何,唔好處就係依啲影片通常冇進行編目,A調酒師就講呢樣,B 調酒師就講嗰樣,啲內容零零碎碎咁樣都唔知從何學起先好。


2. 搵朋友教

搵識調酒嘅朋友教,非常之好嘅選擇,因為自己友有傾有講好free咁去玩,可以先了解一下基本調酒嘅知識,睇下自己係咪真係有興趣先,了解完先再認真學就非常好吧,唔好處就係朋友嘅調酒工具同酒水數量有限,換言之學嘅知識亦局限咗,所以只可以學習到初步了解。


3. 買書睇

喺書局買書自我學習,呢一個方法同第一個方法有啲相似,但買書係比較有小小優勢,因為書本教學正正就係有編輯過學習流程,即係話你可以跟住個流程由基本學到進階專業,百幾蚊一本書搞掂,正!唯一嘅失敗之處,就係冇工具同酒水喺手,意思同你買一本烹飪書但冇烹飪工具同食材一樣,書本文字上有時亦好難理解到確實意義,所以如果從書中學習的話,便要花更多時間進行文字理解消化,亦要自己買勁多嘅工具同酒水學習。


4. 入酒吧做野邊做邊學

直接入酒吧開工邊學邊做,老實講依個方法比起上面嗰三個應該係最好,酒吧內工具酒水齊全,亦有調酒師偷下師叫佢教吓,可以實戰之餘仲有人工出,掂呀!但世事又豈能夠盡如人意呢,有好亦有壞,入到酒吧如果你係白紙嘅話要從基本做起,例如做下清潔呀,切下水果呀,搬吓貨呀,總之係由一般dirty work做起令到你更了解酒吧嘅整體運作嘅,當你做咗一段時間先可能會有機會幫調酒師手一齊做吓,從中慢慢學習,對!係慢慢慢慢學,因為調酒師係唔會喺工作時間入邊有空閒時間去教你好多嘢嘅,唔係佢唔想教,係冇時間詳細去教,所以用依個方法去學調酒,係要花勁長嘅時間尼換取嘅。


5. 報名上堂學

終於講到依個方法,可以比我sell吓課程,我哋平時不論學什麼專業嘅嘢,都係會去報名上堂,Why?因為一般課程嘅設計係預設咗你係一張白紙由零開始學起到專業,亦會為你準備好所有需要嘅物件,有乜嘢唔明又可以即時發問知道答案,大大縮短學習時間又唔使自己準備任何工具,所以理論上一定係最好嘅學習途徑,咁樣解釋應該好易理解吧!真係咁好?梗係唔係啦,因為咁好嘅嘢係要交學費嘛,市面上調酒課程學費有平有貴,點揀好呢?你問我嘅話當然係揀我哋嘅最好啦,賣花讚花香嘛,哈哈!所以每位想上堂學嘅朋友,以下我會列出幾個最基本課程內容重點解說一下,令你更加了解而不會被騙,然之後你喺網上搵晒所有喺香港開辦嘅調酒課程內容自己做對比,咁樣揀出自己認為最正嘅課程就可以啦。



調酒課程的重點選擇對與錯:


1. 課程有冇證書㗎?

依題係一d學生問嘅常見問題,事實上我可以話俾你聽好多世界級嘅頂尖調酒師都冇什麼國際認可證書的,原因好簡單,因為世界各地並沒有列明做調酒師是需要什麼國際認可證書的,除了美國,當地政府要求調酒師需持當地政府牌照工作,佢哋持牌嘅原因係希望調酒師有能力控制市民唔好輕易飲醉酒而導致危險,而唔係關於調酒技巧的,所以你認為有什麼什麼證書有實際用途嗎?不相信可自行上網查看喔。


2. 上堂一對一有比較好嗎?

首先講上堂時間先,一對一基本上係可以自行約定上堂時間日子,要幾free有幾free,而班制課程就要乖乖地喺固定上堂時間度出現咯,其次係學習方面,一對一可以針對每個人唔同嘅學習能力而作出調整,簡單尼講即係你有邊度唔明導師就會花多啲時間落去嗰度講解多啲,而班制課程因學員眾多而做唔到依個效果,所以如果你想徹底學習,當然係揀私人一對一去上堂啦,對吧!


3. 課程入邊會學識幾多款雞尾酒㗎?

喺雞尾酒世界入面,款式千變萬化,都係果句,世界冠軍級調酒師都唔會識做所有雞尾酒的,即係乜嘢意思呢?意思就係學調酒唔應該從雞尾酒數量嘅方向而定,正確嘅方法係應該知道每款酒水嘅特性,加上分量控制嘅認知,咁樣就可以好輕易調製出林林總總不同嘅雞尾酒喇,同學習數學一樣,係學識基本運算嘅原理,從而學識千變萬化嘅數學,這樣你聽得懂嗎?


4. 調酒技巧可以學到幾多種?

市面上大部份嘅課程基本上都會包含最傳統基本嘅調酒技巧方法,這樣足夠嗎?我咁樣問當然係唔足夠啦,調酒文化日新月異,每個時期都有唔同嘅潮流趨勢,如果我哋淨係學識最傳統嘅基本調酒方法,就會好似我仍用唐朝嘅醫術去醫治現代人一樣,有點怪怪的!當然依個說法我係誇張咗令大家更容易理解,想表達嘅係傳統技巧當然重要,但我們處於現代尼講,新穎嘅調酒技巧亦都係必須的,所以你希望知道學到幾多種,答你唔到係因為地球仍在轉,技巧不斷增加,總言之唔好只學傳統嗰幾種就對了!一定要與時並進。


5. 課程入面的雞尾酒材料份量控制有國際標準嗎?

先答你有,但我哋行內專業嘅唔會叫做國際標準咁老土,而係可以係參考嘅比例而己,大家上網去搵一啲雞尾酒調製食譜,通常都會列出什麼材料要用什麼份量,但呢個唔係什麼國際標準,難道乾炒牛河也需要國際標準嗎?喺我哋實際製作飲品又好食物又好,係會有好多唔同嘅份量變化而唔係根據什麼國際標準的,原因係因為每個人有唔同嘅喜好口味,所謂嘅參考係等你較容易知道用什麼材料同份量大概幾多去作出調整,了解嗎?所以喺國際社會上並沒有什麼材料份量控制國際標準的,係參考!係參考!係參考呀!冇International Standard呀!!!真係激死人,哈哈。


6. 完成課程後有工作介紹嗎?

市面上有啲調酒課程會同你講上完堂就介紹酒吧工作俾你,冇錯!確實係有,當然你唔比錢報讀就唔會幫你介紹啦,但介紹俾你的話都要留意返,介紹啲乜嘢類型酒吧俾你先,如果介紹一啲狂飲啤酒嘅劈場俾你做,你真係會開心嗎?到時你願意做嗎?其實喺香港飲食業,本身需求就好大,不論酒店或高級酒吧都長期請人,只要你對依行有興趣而個人又正正常常,基本上入行冇難度,當然有調酒嘅知識當見習調酒師就更加好啦,所以與其等人介紹啲低端酒吧俾你做,不如自己去見自己鍾意嘅酒吧,這不是更好嗎?一般見工去見調酒師職位,酒吧經理都會問你一啲基本調酒問題,亦會叫你做一兩杯雞尾酒睇睇,人工方面就會視乎你經驗而定,就係咁簡單!所以嗰啲俾錢報課程有工作介紹依類型嘅嘢,你自己諗諗咯。

哈哈!開頭諗住寫篇短文張簡單介紹吓學調酒嘅途徑,點知變咗長篇大論添,以上五個途徑我建議大家都去作出嘗試,因為唔同嘅方法係有唔同嘅獲益之處,我認!我哋貪心!學晒佢就最好吧。


若想了解我們的調酒課程或購買調酒工具,可參觀以下我們的相關連結哦。

1. FLAIR IRON一對一CMB專業調酒課程

2. FLAIR IRON STORE(線上購買調酒工具)

47 次瀏覽

HONG KONG

0